Inter finalisti dyte
28/04/2010 23:00
Interi është skuadra tjetër finaliste e Ligës së Kampioneve, pasi është kualifikuar në “Camp Nou” edhe pse është mundur me rezultatin minimal 1-0 në këtë ndeshje kthimi me Barcelonën.
Ka qenë një skuadër e tërhequr ajo e Interit në këtë takim, pasi ka qëndruar gjatë gjithë ndeshjes në pritje të sulmeve të Barcelonës duke neutralizuar çdo aksion të skuadrës më të frikshme të momentit.
Të pakta ishin rastet e pjesës së parë për skuadërn e Guardiolës, ndërkohë që gjyqtari i ndeshjes bëhet protagonist në minutën e 26-të, kur nxjerr me karton të kuq Tiago Motën për një ndërhyrje e cila më shumë ishte simulim i Buskets.
Edhe pse me një lojtar më shumë, muri mbrojtës i krijuar nga Interi, përfshirë këtu dhe sulmuesit Eto e Milito, rezultoi efikas duke e mbyllur pjesën e parë 0-0.
Në të dytën e gjithë loja zhvillohet në mesfushën zikaltër e cila në mënyrë perfekte në prapavijë nuk lejon asnjë top të kalojë për te Zhulio Sezar. Në fundin e takimit sërish gjyqtarët, këtë herë anësori, bëhet protagonist duke lejuar Piken të shënojë edhe pse u nis nga një pozicion jashtë loje.
Megjithatë me rezultatin 1-0 përfundon kjo ndeshje duke i dhënë mundësinë Interit që të kalojë për në finalen e madhe falë fitores 3-1 në ndeshjen e parë në Milano.
Finalja mes Bajernit të Mynihut dhe Interit do të zhvillohet më 22 maj në stadiumin e Realit të Madridit “Santiago Bernabeu”.